ای گویول فریاده گل  دوشدو علمدارین قولو

ظولمولا اولدو قلم ،غئیرتلی  سردارین قولو

چون یزید – بی حیا  ظولمونده  طوغیان  ائیله دی

توکمگه قانین  حسینین  عهد و پیمان ائیله دی 

گوردو قارداشین  کومکسیز ،عزم – مئیدان  ائیله دی

جیسمدن آیریلدی  عباس – وفادارین قولو

خئیمه لرده مونتظیر  دورموش حسین – بی نوا

ناگهان بیر سس اوجالدی : هاردا قالدین  یا اخا ؟

چون ائشیتدی  بو سسی  بیچاره  شاه – کربلا

رنگی  سولدو ،دوشدو قوووتدن  او بی یارین قولو

چون علم یاتدی ،حسین آت چاپدی اشرار اوستونه

تاپدی عباسی ،اوزون سالدی  علمدار اوستونه

ذولفیقارین  برقی  دوشدو چرخ – دووار  اوستونه

قول لارین آچدی نه گوردو ،یوخ  سپهدارین قولو

گوردو  چون لشگر ،حسینی بی پناه و ناامید

نه علی اکبر ، نه قاسیم وار نه سردار – رشید

قووم – بی رحم ائیله دی آخر او مظلومو شهید

خیمه لر تالان اولوب  ،باغلاندی  بیمارین قولو